Muaji maj njihet në shumë vende të botës si “Muaji Ndërkombëtar i Masturbimit”, një iniciativë që synon të rrisë ndërgjegjësimin mbi shëndetin seksual dhe të luftojë paragjykimet që vazhdojnë të ekzistojnë rreth autoerotizmit.

Sipas Vanity Fair, ideja lindi në vitin 1995, një vit pasi ish-kirurgia e përgjithshme e Shteteve të Bashkuara, Jocelyn Elders, foli publikisht për përfitimet psikofizike të masturbimit dhe sugjeroi që tema të trajtohej edhe në programet e edukimit seksual në shkolla. Deklaratat e saj shkaktuan polemika të forta dhe i kushtuan vendin e punës, por në të njëjtën kohë hapën një debat të madh publik.

Pas kësaj, kompania “Good Vibrations” vendosi të shpallte majin si muaj dedikuar masturbimit, iniciativë që më pas u përhap në shumë vende të botës.

Ekspertët e shëndetit seksual theksojnë se masturbimi mund të ketë disa përfitime si ulja e stresit, relaksimi, njohja më e mirë e trupit dhe përmirësimi i mirëqenies psikologjike. Sipas seksologëve, praktika ndihmon gjithashtu njerëzit të kuptojnë më mirë reagimet dhe nevojat e tyre intime.

Disa studime kanë sugjeruar edhe përfitime të mundshme fizike. Një studim amerikan i përmendur në artikull thekson se tek meshkujt, ejakulimi i shpeshtë mund të lidhet me një rrezik më të ulët për probleme të prostatës. Ndërkohë, për gratë, specialistët nënvizojnë se autoerotizmi mund të ndikojë pozitivisht në vetëvlerësim dhe mirëqenie emocionale.

Pse u zgjodh pikërisht maji? Përveç lidhjes simbolike të pranverës me “rizgjimin”, media italiane shkruan se emri “maggio” dhe “masturbazione” krijojnë gjithashtu një lojë fjalësh me shkronjën “M”.

Megjithatë, pavarësisht diskutimeve dhe iniciativave ndërkombëtare, tema vazhdon të mbetet tabu në shumë shoqëri, ku shpesh konsiderohet ende një çështje për të cilën flitet me vështirësi.
Nga Vanity Fair