Gazetarja Esiona Konomi ka denoncuar një rast flagrant të mënyrës se si zyrtarë të lartë të qeverisë përdorin kabinetet e tyre për “qoka politike”, duke i mbushur me emra që paguhen nga taksat e qytetarëve, pa kryer funksione reale.

Sipas Konomit, rasti më i fundit lidhet me kabinetin e ish-kryetares së Kuvendit, Elisa Spiropali, i cili u shkarkua menjëherë nga kryeparlamentari i ri, Niko Peleshi.

Në një postim në rrjetet sociale, gazetarja thekson se ish-banorja e “Big Brother Vip”, moderatorja Zhaklina Gjolla, e cila mbante postin e zëdhënëses së kabinetit të Spiropalit, nuk ka pasur asnjë komunikim me gazetarët. Detyra e saj – sipas Konomit – ka qenë të realizonte vetëm “reels”-a të bukur për rrjetet sociale të ish-kryeparlamentares.

Në listën e stafit figuron edhe ish-eurodeputeti gjerman Knut Fleckenstein, i cili paguhej 1600 euro në muaj nga taksapaguesit shqiptarë. “Nuk është e qartë se çfarë pune konkrete mund të bënte ai për Spiropalin”, nënvizon gazetarja.

Pjesë e kabinetit ka qenë gjithashtu Edon Beci, djali i kryebashkiakut të Shkodrës, Benet Beci, i cili merrte një pagë prej 1800 eurosh si këshilltar. Me të njëjtën shumë shpërblehej edhe ish-deputeti socialist i Vorës, Sadi Vorpsi, pa u sqaruar ndonjëherë se çfarë ekspertize i ofronte Kryetares së Kuvendit.

Në listë gjendet edhe emri i analistit të njohur Lorenc Vangjeli, i cili çdo mbrëmje shfaqet në ekrane televizive për të komentuar politikën.

Konomi përmbyll denoncimin e saj duke e cilësuar kabinetin e Spiropalit si një shembull tipik të “kabineteve të qokave”, ku postet politike shpërndahen si favore dhe jo si përgjegjësi publike.