Lifestyle
Zbulohet “Super Toka”, planeti gjigant me kushte të mundshme për jetë
3 Korrik, 2026 | 9:18 am
Shkencëtarët kanë identifikuar një “Super Tokë” të re, e cila ndodhet rreth 28 vite dritë larg Sistemit Diellor dhe konsiderohet një nga kandidatët më premtues për të pasur kushte të favorshme për jetën.
Planeti, i quajtur Gliese 48b, orbiton brenda të ashtuquajturës zonë e banueshme, një rajon ku temperaturat teorikisht mund të lejojnë ekzistencën e ujit në gjendje të lëngshme.
Edhe pse ende nuk është konfirmuar nëse planeti ka një atmosferë të aftë të ruajë nxehtësinë, astronomët theksojnë se pozicioni i tij ndaj yllit pritës krijon kushte premtuese për praninë e ujit në sipërfaqe.
Gliese 48b mendohet të ketë një masë rreth tetë herë më të madhe se ajo e Tokës, ndërsa distanca e tij nga ylli amë rrit mundësinë që temperaturat të jenë të përshtatshme për ekzistencën e ujit të lëngshëm.
Një tjetër element që ka zgjuar interesin e shkencëtarëve është fakti se sistemi planetar rrotullohet rreth një xhuxhi të kuq, një lloj ylli i njohur për aktivitetin e tij të lartë magnetik. Kjo mund ta bëjë më të vështirë zbulimin e planetëve, pasi sinjalet e yllit mund të ngatërrohen me ato të një trupi qiellor.
Megjithatë, në këtë rast, ekzistenca e Gliese 48b u konfirmua vetëm pas 15 vitesh vëzhgimesh dhe analizash të hollësishme, duke kombinuar të dhënat e mbledhura nga disa teleskopë dhe instrumente astronomike.
