Venezuela vijon të përjetojë një nga tragjeditë më të rënda të viteve të fundit, pas dy tërmeteve të fuqishme që goditën vendin javën e kaluar. Ndërsa ekipet e shpëtimit punojnë pa ndërprerje, mijëra persona rezultojnë ende të zhdukur nën rrënoja.

Bilanci i viktimave ka arritur në të paktën 1,450 të vdekur, ndërsa shumë familje vazhdojnë të presin me ankth lajme për të afërmit e tyre.

Mes dhimbjes, nuk kanë munguar as mrekullitë. Gjatë fundjavës, 33 persona u nxorën të gjallë nga ndërtesat e shembura. Mes tyre ishte edhe 11-vjeçari Moises, i cili u gjet rreth tre metra nën rrënoja, pranë trupave të pajetë të nënës dhe motrës së tij. Një tjetër djalë i së njëjtës moshë u shpëtua në një operacion të veçantë.

Edhe pse kanë kaluar më shumë se 72 orë nga tërmetet, ekipet e kërkim-shpëtimit nuk kanë humbur shpresën. Specialistët besojnë se nën rrënoja mund të ketë ende të mbijetuar, veçanërisht nëse kanë pasur mundësi të sigurojnë ujë ose ushqim.

Ndërkohë, banorët e zonave më të prekura vazhdojnë të kërkojnë vetë për familjarët e tyre, ndërsa kërkojnë më shumë mjete të rënda për largimin e betonit dhe mbeturinave.

Në të njëjtën kohë janë shtuar edhe kritikat ndaj autoriteteve, të akuzuara për reagim të ngadaltë dhe mungesë koordinimi në orët e para pas katastrofës. Sipas banorëve, vonesat dhe bllokimi i rrugëve kanë penguar mbërritjen e ndihmave.

Mijëra njerëz që kanë humbur shtëpitë po qëndrojnë në makina ose kampe të improvizuara, ndërsa fusha e golfit në Caraballeda është kthyer në një qendër emergjence për strehimin e të prekurve dhe shpërndarjen e ndihmave.

Në mbështetje të operacioneve kanë mbërritur edhe ekipe ndërkombëtare nga Meksika, Spanja, Katari, Shtetet e Bashkuara dhe Mbretëria e Bashkuar. Sipas OKB-së, rreth 2,000 specialistë të kërkim-shpëtimit, të pajisur me qen të trajnuar, personel mjekësor dhe mikro-dronë, janë angazhuar në përpjekjet për të gjetur sa më shumë të mbijetuar.