Lajme
Tensione mes pushuesve në Spanjë, debati pranë pishinës për shezlong përfundon me të plagosur
28 Qershor, 2026 | 8:05 am
Një konflikt mes pushuesve në një hotel në Spanjë u përshkallëzua në dhunë, duke lënë të plagosur rëndë një vajzë 13-vjeçare.
Ngjarja ndodhi në një resort në zonën e Santa Susanna, në Katalonjë. Sipas dëshmitarëve, gjithçka nisi pas një mosmarrëveshjeje për një shezlong pranë pishinës.
Raportohet se 13-vjeçarja britanike ishte ulur në një shezlong, pa qenë në dijeni se një familje tjetër pretendonte se e kishte zënë më herët. Debati verbal u përshkallëzua shpejt në përplasje fizike mes disa turistëve.
Dëshmitarët thanë se situata doli jashtë kontrollit, me persona që godisnin dhe shtynin njëri-tjetrin. Gjatë incidentit, një burrë dyshohet se sulmoi edhe të miturën.
Vajza u largua nga vendi i ngjarjes e gjakosur për të marrë ndihmë mjekësore, ndërsa raportohet se edhe disa turistë të tjerë pësuan lëndime të lehta. Autoritetet po hetojnë rrethanat e incidentit.
