Shkalla e obezitetit në Kinë po rritet me ritme të shpejta, ndërsa një fenomen i ri i quajtur “burgjet e dhjamit” po përhapet si një mënyrë ekstreme për të humbur peshë.

Bëhet fjalë për qendra me regjim të rreptë, të ngjashme me disiplinën ushtarake, ku pjesëmarrësit i nënshtrohen dietave të forta dhe stërvitjeve intensive, nën mbikëqyrje të vazhdueshme, për të shmangur çdo shkelje të rregullave, përfshirë edhe konsumimin e fshehtë të ushqimit.

Të dhënat tregojnë se numri i fëmijëve obezë në Kinë është rritur ndjeshëm që nga viti 2000, ndërsa mbi gjysma e të rriturve rezultojnë mbipeshë. Parashikimet janë edhe më shqetësuese: deri në vitin 2030, rreth 65% e popullsisë së rritur mund të jetë mbipeshë ose obeze.

Në këtë kontekst, është vënë re një shtim i madh i qendrave që premtojnë rezultate të shpejta, shpesh brenda një muaji. Personat regjistrohen me dëshirë, zakonisht për periudha disa javore, por pasi hyjnë në këto ambiente, dalja nuk është gjithmonë e lehtë.

Objektet janë të pajisura me masa të forta sigurie, si porta metalike dhe, në disa raste, edhe sisteme të kontrollit të rreptë të lëvizjes. Daljet monitorohen vazhdimisht nga stafi, ndërsa programet përfshijnë edhe versione më të shkurtra dyjavore, megjithatë trajnerët këshillojnë ciklin e plotë 28-ditor si më efektivin.

Shumë prej këtyre qendrave janë të hapura edhe për të huaj dhe nuk kërkojnë njohuri të gjuhës kineze. Një pjesëmarrëse nga Australia ka treguar se arriti të humbiste peshë brenda pak javësh, por përjetoi lodhje të madhe fizike dhe vështirësi psikologjike, duke theksuar se pas përfundimit të programit, organizmi e kishte të vështirë të rikthehej në një regjim normal ushqimi.

Fenomeni ka hapur debat për sigurinë e këtyre praktikave, sidomos pas një rasti në vitin 2023, kur një influencuese 21-vjeçare humbi jetën gjatë një programi të tillë, duke ngritur pikëpyetje serioze mbi rreziqet që mbartin.

Ekspertët paralajmërojnë se industria e dobësimit të shpejtë po përfiton nga presioni social për trupin ideal, ndërsa kërkohet ndërhyrje më e fortë dhe rregullim më i qartë nga autoritetet për të garantuar sigurinë e pjesëmarrësve.