Një studim i publikuar në revistën shkencore Nature Food dhe i cituar nga portali britanik The Mirror ka nxjerrë në pah ndikimin që zgjedhjet tona ushqimore mund të kenë në shëndetin afatgjatë.

Sipas studiuesve të Universitetit të Miçiganit, konsumimi i një pijeje të gazuar si Coca-Cola mund të shoqërohet me humbjen e rreth 12 minutave jetë të shëndetshme. Në të njëjtën kohë, një hot-dog mund të reduktojë deri në 36 minuta jetë të shëndetshme, ndërsa një porcion me arra dhe fara mund të shtojë rreth 25 minuta.

Për të arritur në këto përfundime, shkencëtarët analizuan më shumë se 5.800 produkte ushqimore të konsumit të përditshëm në SHBA. Ata vlerësuan ndikimin e secilit ushqim në shëndetin e njeriut duke përdorur të dhëna nga studimi global “Global Burden of Disease”, si dhe analizuan efektet e tyre në mjedis gjatë gjithë ciklit të jetës së produktit.

Sipas The Mirror, studiuesit zbuluan se zëvendësimi i vetëm 10 për qind të kalorive të përditshme që vijnë nga mishi i viçit dhe mishi i përpunuar me fruta, perime, drithëra integrale, arra, bishtajore dhe produkte të përzgjedhura deti mund të shtojë deri në 48 minuta jetë të shëndetshme në ditë.

Ekspertët rekomandojnë shtimin në dietë të ushqimeve me vlera të larta ushqyese, si frutat, perimet dhe arrat, si dhe reduktimin e konsumit të mishrave të përpunuar dhe produkteve të tjera ultra të përpunuara.

“Urgjenca për të ndryshuar zakonet ushqimore për të përmirësuar shëndetin e njerëzve dhe mjedisin është e qartë”, është shprehur studiuesi Olivier Jolliet, duke theksuar se edhe ndryshimet e vogla në dietë mund të sjellin përfitime të konsiderueshme.

Megjithatë, autorët sqarojnë se këto shifra janë vlerësime statistikore dhe nuk nënkuptojnë se një pije e vetme ose një ushqim i vetëm do të ndikojë drejtpërdrejt në jetëgjatësinë e një personi. Ato tregojnë ndikimin e zakoneve ushqimore të përsëritura në afat të gjatë.