Lifestyle
Shkëputja nga rrjetet sociale për 7 ditë, ja si e përmirëson shëndetin mendor
21 Dhjetor, 2025 | 5:39 pm
Një pauzë e shkurtër nga rrjetet sociale mund të ketë ndikim të ndjeshëm pozitiv në shëndetin mendor, sidomos te të rinjtë. Sipas një studimi të publikuar në JAMA Network Open, heqja dorë nga platformat sociale për vetëm një javë ndihmon në uljen e depresionit, ankthit dhe problemeve me gjumin.
Studimi u krye me 373 të rinj të moshës 18–24 vjeç, të cilët përdornin rregullisht rrjete si Instagram, TikTok, Facebook, Snapchat dhe X. Një pjesë e tyre ndërpreu përdorimin për një javë, ndërsa të tjerët vazhduan normalisht, duke raportuar gjendjen emocionale para dhe pas eksperimentit.
Rezultatet treguan se rreth një e katërta e pjesëmarrësve përjetuan ulje të ndjeshme të simptomave të depresionit, një pjesë raportoi më pak ankth dhe përmirësim të gjumit, veçanërisht ata që më parë kishin shqetësime më të theksuara. Përfundimi i studiuesve është i qartë: edhe një distancë e shkurtër nga rrjetet sociale mund t’i japë mendjes dhe trupit një pushim të domosdoshëm nga presioni i vazhdueshëm dixhital.
