Lifestyle
Ndryshim historik për Çmimet Oscar, ceremonia pritet të zhvendoset nga TV në YouTube
20 Dhjetor, 2025 | 12:33 pm
Ceremonia e Çmimeve Oscar pritet të hyjë në një kapitull krejtësisht të ri sa i përket transmetimit televiziv dhe digjital. Akademia e Arteve dhe Shkencave të Filmit ka konfirmuar se, duke nisur nga viti 2029, eventi më prestigjioz i kinemasë botërore nuk do të shfaqet më në rrjetin ABC, por do të transmetohet ekskluzivisht në YouTube.
Marrëveshja aktuale me ABC do të mbetet në fuqi deri në vitin 2028, vit ky simbolik që shënon 100-vjetorin e Oscarëve. Pas këtij jubileu historik, YouTube do të marrë përsipër të drejtat globale të transmetimit për periudhën 2029–2033, duke e zhvendosur ceremoninë për herë të parë plotësisht në një platformë digjitale.
Sipas planit të ri, publiku në mbarë botën do të ketë mundësinë ta ndjekë ceremoninë drejtpërdrejt dhe pa pagesë në YouTube. Përveç ndarjes së çmimeve, transmetimi do të përfshijë edhe tapetin e kuq, pamje ekskluzive nga prapaskena, si dhe Ballin tradicional të Guvernatorëve. Në SHBA, eventi do të jetë i aksesueshëm edhe përmes YouTube TV, ndërsa reklamat do të vijojnë të jenë pjesë e formatit.
Drejtuesit e Akademisë e kanë përshkruar këtë bashkëpunim si një hap strategjik për të rritur shtrirjen globale të Oscarëve, duke vënë theksin te funksionalitete si titrat dhe audioja në disa gjuhë, që synojnë ta bëjnë ceremoninë më të aksesueshme për audienca të ndryshme.
Nga ana e YouTube, ky partneritet shihet si një mundësi për të afruar brezat e rinj me artin e filmit, duke ruajtur njëkohësisht traditën dhe peshën kulturore që Oscarët kanë ndërtuar ndër dekada.
