Katër persona u plagosën rëndë në një shpërthim dhe zjarr gjatë paradites së sotme në qytetin suedez të Gothenburg,Suedi dhe policia po heton nëse një pajisje shpërthyese ishte vendosur në vendin e ngjarjes.

Të paktën 16 persona u dërguan në spital pasi shpërthimi i mëngjesit herët i vuri flakën një bllok apartamentesh në një zonë qendrore të banimit. Zjarrfikësit nxorrën njerëzit nga ndërtesa ndërsa tymi gri doli nga shkallët dhe dritaret.

Tre gra dhe një burrë u trajtuan për lëndime të rënda, tha një zëdhënës i Spitalit Universitar Sahlgrenska. Radioja e shërbimeve publike suedeze SR raportoi se rreth 25 njerëz ishin dërguar në spitale rreth qytetit të dytë më të madh të Suedisë.