Një kapitull i jashtëzakonshëm në karrierën e sopranos shqiptare Ermonela Jaho është mbyllur në mënyrën më madhështore. Në skenën e Teatro Costanzi në Romë, artistja interpretoi për herë të fundit Violetën në kryeveprën “La Traviata” të Giuseppe Verdit, personazhin që e bëri një nga emrat më të admiruar të operës ndërkombëtare.

Pas afro 300 interpretimeve në skenat më prestigjioze të botës, si Royal Opera House në Londër, Metropolitan Opera në Nju Jork, Opéra National de Paris, Bayerische Staatsoper dhe Teatro Real në Madrid, Jaho vendosi t’i japë fund një roli që është bërë sinonim i emrit të saj. Për më shumë se dy dekada, ajo ka magjepsur publikun dhe kritikën me interpretimin e saj të thellë emocional, duke e kthyer Violetën në një personazh që jetonte përmes zërit dhe shpirtit të saj.

Edhe në Romë, Ermonela Jaho u prit me superlativa. Kritika vlerësoi se ajo nuk e interpreton thjesht Violetën, por e mishëron plotësisht, duke i dhënë çdo note, fjale dhe gjesti një intensitet të rrallë artistik. Akti i tretë i operës u cilësua si kulmi i mbrëmjes, një performancë që preku thellë publikun dhe konfirmoi edhe një herë madhështinë e artistes shqiptare.

Produksioni, që shënon dhjetë vjet në repertorin e Operës së Romës, mbante firmën e regjisores Sofia Coppola, me skenografi të Nathan Crowley, kostume të Valentino Garavanit dhe drejtim muzikor nga dirigjenti Francesco Ivan Ciampa. Krahas Jahos interpretuan tenori Dmitry Korchak në rolin e Alfredos dhe baritoni Amartuvshin Enkhbat si Giorgio Germont.

Për kritikët ndërkombëtarë, Ermonela Jaho mbetet Violeta më e spikatur e brezit të saj, një artiste që ka arritur të bashkojë mjeshtërinë vokale me një ndjeshmëri të jashtëzakonshme skenike. Lamtumira e saj nga ky rol nuk është thjesht fundi i një interpretimi, por mbyllja e një epoke të artë në historinë e operës, duke lënë pas një trashëgimi që do të frymëzojë artistë dhe adhurues të muzikës klasike për shumë vite.