Eurovision po përballet me një nga momentet më të vështira në historinë e tij, pasi të enjten pritet të merret një vendim që mund të ndikojë drejtpërdrejt në edicionin e vitit 2026. Anëtarët e European Broadcasting Union (EBU) do të shqyrtojnë rregullore të reja që synojnë të kufizojnë ndikimin politik dhe promovimin e tepruar, në një kohë kur polemikat janë intensifikuar për pjesëmarrjen e Izraelit.

Rregullat e reja synojnë të parandalojnë ndërhyrjen e qeverive në fushatat e votimit, por EBU ka paralajmëruar se nëse anëtarët nuk bindën për efektivitetin e tyre, do të zhvillohet një votim për pjesëmarrjen në garë. Edhe pse Izraeli nuk përmendet drejtpërdrejt, situata ka një peshë të dukshme kundrejt debateve të fundit.

Katër televizione publike – nga Sllovenia, Irlanda, Spanja dhe Holanda – kanë kërcënuar me bojkot nëse Izraeli lejohet të marrë pjesë. Ato shprehin shqetësim për gjendjen humanitare në Gaza, ku numri i viktimave palestineze raportohet të ketë kaluar 70 mijë. Një bojkot i tillë nga vende të rëndësishme mund të ndikojë negativisht në audiencën prej rreth 150 milionë shikuesish dhe të rrezikojë marrëdhëniet me sponsorët.

Sipas ekspertëve, ky është një moment që mund të përcaktojë drejtimin e Eurovisionit. Studiuesi Paul Jordan e cilëson situatën si një krizë të vërtetë dhe thotë se votimi është pothuajse i pashmangshëm. Ndërkaq, Ben Robertson nga ESC Insight paralajmëron se përjashtimi i Izraelit mund të çojë në izolimin e konkursit, ndërsa pjesëmarrja e tij rrezikon të nxisë një bojkot të gjerë.

Burime të brendshme sugjerojnë se Gjermania mund të tërhiqet nga transmetimi i konkursit nëse Izraeli përjashtohet, ndërsa Austria vendi pritës i edicionit e mbështet pjesëmarrjen e tij. Nga ana tjetër, KAN, transmetuesi izraelit, e quan debatin të padrejtë dhe thekson se kanë respektuar plotësisht të gjitha rregullat.

Vendimi i së enjtes do të përcaktojë jo vetëm listën finale të pjesëmarrësve, por edhe të ardhmen e Eurovisionit si një event që tradicionalisht pretendon të jetë jopolitik.