Festivali i 64-të i Këngës në RTSH pritet të jetë një nga edicionet më të fuqishme të viteve të fundit dhe këtë e konfirmon edhe autorja Belioza Çoku, e cila ka zbuluar disa prej risi-ve që do ta dallojnë Fest 64 nga çdo festival tjetër i këtij viti. Sipas saj, ky edicion vjen me një vizion më modern, me ide më të qarta dhe me një nivel të kompozimeve që tejkalon pritshmëritë.

Belioza shprehet se këngët e këtij viti kanë impakt të menjëhershëm dhe sjellin energji të re në skenën e RTSH-së. Sipas saj, festivali është konceptuar për të nxjerrë në pah identitetin e vërtetë artistik të çdo konkurrenti, me performanca të punuara në detaj dhe me një qasje shumë më bashkëkohore në skenografi, drita dhe narrativë muzikore.

Ajo thekson se Fest 64 është një nga festivalet me më shumë ide dhe kreativitet, duke përfshirë një frymë bashkëpunimi mes autorëve dhe këngëtarëve, një prezantim më dinamik për publikun televiziv dhe një strukturë artistike që i afrohet standardeve europiane. Çoku tregon se këtë vit çdo këngë është trajtuar si projekt më vete, me një investim emocional dhe profesional që i jep festivalit peshë më të madhe se në edicionet e kaluara.

Nga 17 deri më 20 dhjetor, publiku do të ketë mundësinë të ndjekë një festival që synon të jetë jo vetëm garë, por edhe pasqyrë e atmosferës muzikore të vendit. Burime të Kryefjala.com tregojnë se ky është edicioni ku RTSH ka investuar më shumë në inovacion dhe identitet, me qëllim që Fest 64 të kthehet në evenimentin më influent të vitit.

Me këto risi dhe me pritshmëri të larta, Fest 64 duket i gatshëm të bëhet festivali më i komentuar, më modern dhe më i suksesshëm i këtij viti.