Kur flasim për një gjumë cilësor, zakonisht vëmendja shkon te dysheku, jastëku, temperatura e dhomës apo përdorimi i telefonit para se të flemë. Megjithatë, edhe një element që shpesh anashkalohet, si ngjyra e mureve të dhomës së gjumit, mund të ndikojë në atmosferën e ambientit dhe në ndjesinë e qetësisë.

Sipas Michelle Lewis, eksperte e psikologjisë, një nga zgjedhjet më të përshtatshme është bluja e butë dhe e zbehur, veçanërisht kur përmban nëntone gri.

“Dhoma e gjumit është ambienti i fundit që përjeton sistemi nervor para gjumit dhe i pari që sheh kur zgjohemi”, shpjegon Lewis për “Parade”.

Sipas saj, tonet e ftohta, mes tyre bluja, jeshilja dhe vjollca e butë, lidhen përgjithësisht me një atmosferë më të qetë. Por rëndësi të veçantë ka edhe intensiteti i ngjyrës.

Një blu e fortë dhe shumë e ndezur mund të jetë tepër stimuluese, ndërsa nuancat e zbehura dhe me nënton gri janë më të buta për syrin dhe krijojnë një ambient më relaksues.

Një tjetër alternativë është grija e ngrohtë, e cila krijon neutralitet pa e bërë dhomën të duket tepër e ftohtë. Tonet që afrohen me bezhën mund të kombinohen me ngjyra të tjera përmes çarçafëve, perdeve, qilimave apo elementeve dekorative.

Edhe jeshilja në nuancën e sherebelës konsiderohet një zgjedhje e përshtatshme. E frymëzuar nga ngjyrat e natyrës, ajo mund t’i japë dhomës një atmosferë të qetë dhe të freskët. Disa studime kanë sugjeruar gjithashtu një lidhje mes ambienteve të gjelbra dhe treguesve më të ulët të stresit krahasuar me ambiente më stimuluese.

Për ata që preferojnë tone më të errëta, një nuancë mes blusë dhe jeshiles mund të krijojë një atmosferë intime dhe elegante, për sa kohë që ngjyra nuk është tepër e ndritshme.

Një tjetër mundësi është livandoja e zbehur. Ajo ruan karakterin qetësues të toneve të ftohta, por njëkohësisht i jep ambientit një pamje më të ngrohtë dhe ëndërrimtare. Edhe në këtë rast rekomandohen nuancat me nënton gri dhe jo vjollca e fortë.

Në anën tjetër, disa ngjyra mund të mos jenë zgjedhja ideale për dhomën e gjumit. E kuqja e ndezur konsiderohet tepër stimuluese, ndërsa e verdha intensive mund të krijojë një ndjesi energjie që përshtatet më shumë me kuzhinën apo ambientet e punës.

Edhe e bardha shumë e shndritshme nuk është domosdoshmërisht zgjidhja më qetësuese. Sipas Lewis, në disa ambiente ajo mund të krijojë një përshtypje sterile dhe të ftohtë.