Ai është një nga shkrimtarët më të njohur arbëresh të periudhës së Rilindjes. Po flasim për Jeronim De Radën të cilin e njohim përmes veprave të mrekullueshme si “Këngët e Milosaos”, “Flamuri i Arbërit”, etj. Ju do thoni pse na u kujtua De Rada?! Dhe ne e kemi shumë të thjesht përgjigjen, ndoqëm mbrëmë “Jonida’s Room”, dhe pamë që në emisionin e saj ishte e ftuar diplomatja braziliane, Maria Clara De Rada e cila është stërmbesë e publicisitit të njohur arbëreshë.

“Jam shumë krenare që jam këtu, jam gjithashtu shumë krenare që jam disi shqiptare. Familja ime është arbëreshe, kemi rrënjë shqiptare edhe pse jam braziliane, por para 20 vitesh zbulova që kisha origjinë shqiptare. Kur ishim të vegjël gjyshim im thoshte që babai i tij ishte italian, nga Kalabria. Por thoshte gjithashtu që babai i tij fliste një gjuhë të çuditshme. Ai nuk e njihte të atin, pasi kur babai i tij ndërroi jetë ai ishte dy vjeç, por kishte informacionin që babai dhe xhaxhallarët e tij kishin emigruar në Brazil në shekullin e 19-të, ata flisnin një gjuhë të çuditshme, që askush se kuptonte. Në një vend në Brazil, ku tre vëllezërit emigruan nga Kalabria, ndodhet një varr dhe aty shkruhet një mesazh në këtë gjuhë kaq të veçantë. Pas shumë vitesh ne zbuluam që kjo gjuhë është gjuha arbëreshe dhe përmes internetit, që është një burim informacioni shumë i rëndësishëm, zbuluam që jemi nga familja de Rada. Kur zbuluam që kishim një xhaxha të famshëm siç është Jeronim de Rada ne shkuam ta kërkonim atë. Ne vizituam Kalabrinë, vizituam Macchia Albanese ku gjyshi im kish lindur dhe sigurisht që unë doja të vizitoja një ditë edhe Shqipërinë”, është shprehur diplomatja.

Ajo ka treguar gjithashtu edhe koleksionin e saj të pikturave dhe veprave të artit, por nga ana tjetër ka publikuar edhe një libër të vetin me fotografi nga Tirana, të cilat i ka shkrepur gjatë qëndrimit të saj në Shqipëri.

https://youtu.be/mVyJ5xmihyk