Lajme nga vendi
Kaluan mallra kontrabande ne Qafe-Thane, arrestohet doganieri dhe nje shtetas, ja emrat
18 Dhjetor, 2020 | 2:37 pm
Policia ka sekuestruar mallra kontrabandë në doganën e Qafë-Thanës dhe në pranga kanë rënë dy persona, njëri prej të cilëve është doganier.
Të arrestuarit janë Genti Jesku 45 vjeç (drejtuesi i makinës) dhe 51 vjeçari Vladimir Bardhi, ky i fundit doganier në Doganën e Qafë Thanës. Bardhi dyshohet se lejoi kalimin e mallrave të dyshuara kontrabandë, për të cilat paguhet akcizë, duke shpërdoruar detyrën pasi s’ka kryer procedurën e zhdoganimit
“Arrestohen në flagrancë 2 shtetas. Njëri prej të ndaluarve, me detyrë doganier në Doganën e Qafë-Thanës, i cili dyshohet se lejoi kalimin e mallrave të dyshuara kontrabandë, për të cilat paguhet akcizë. Sekuestrohen mallra të dyshuara kontrabandë. Specialistët për Hetimin e Krimeve në Komisariatin e Policisë Pogradec, në vijim të punës për goditjen e aktivitetit kriminal të kontrabandimit të mallrave, arrestuan në flagrancë shtetasit: G. J., 45 vjeç dhe V. B., 51 vjeç (me detyrë doganier në Doganën e Qafë Thanës), të dy banues në Pogradec. Gjatë kontrolleve të ushtruara nga ana e shërbimeve të Policisë, në lagjen nr.1, Pogradec, në mjetin furgon tip “Benz”, me drejtues shtetasin G. J., iu gjetën e sekuestruan sasi me materiale ndërtimi, sasi nafte dhe dy kuti me fruta, të cilat ky shtetas i ka kaluar nga Pika e Kalimit Kufitar Qafë-Thanë, ku doganieri V. B., dyshohet se ka shpërdoruar detyrën duke mos kryer procedurën e zhdoganimit”, thotë policia.
Të arrestuarit akuzohen për veprat penale “Kontrabanda me mallra për të cilat paguhet akcizë”, “Kontrabanda me mallra të tjera”, “Kontrabanda nga punonjës që lidhen me veprimtarinë doganore”.