Sadri Abazi nuk është për momentin në listën e Edi Ramës për deputet. Sipas burimeve të Pamfleti, Rama i ka dërguar një mesazh Abazit, duke i kërkuar që të bëjë një njoftim, ku të deklarojë largimin nga politika, duke falenderuar Partinë Socialiste dhe Ramën për mundësinë që i dhanë, duke e bërë deputet për gjithë këto vite, ku Abazi, duke përdorur mandatin e deputetit, vetëm vitet e fundit, ka marrë mbi 50 milionë euro nga buxheti i shtetit, përmes kompanisë Alko-IMPEX. Rama i ka kërkuar Abazit të deklarojë vetë largimin pas ultimatumit të Shteteve të Bashkuara të Amerikës dhe Brukselit, për të përjashtuar njerëzit e korrupsionit, pastrimit të parave dhe krimit nga lista e kandidatëve për deputetë.

Pas qindra denoncimeve për vjedhjet e Sadri Abazit me tendera në konflikt flagrant interesi pasi është deputet, ka indicie të forta që konfirmojnë se deputeti është futur në listën e zezë nga SHBA, bashkë me Tom Doshin, Vangjush Dakon etj. Sadri Abazi është përmendur edhe në një raport sekret të OSBE, në të cilin thuhet se “Lidhjet e tij të forta me liderët e PS-së i kanë siguruar mbrojtje dhe fshehje të aktiviteteve kriminale të kompanive te tij. I karakterizuar nga një arrogancë ekstreme dhe një tendencë për shantazh, ai është gjithnjë nën shoqërinë e vëllezërve të tij, te cilët janë shumë agresivë. Pasuria e tij përllogaritet në rreth 100 milionë euro”.

Në raportin konfidencial të OSBE thuhet gjithashtu se Sadri Abazi ka pranuar se ai investoi 800 mijë euro në fushatën elektorale të PS-së në Dibër dhe i dha Partisë Socialiste 500 mijë euro të tjera që të gjente një vend të sigurt në listën e kandidatëve për deputetë të vitit 2009.

Emri i Sadri Abazit mësohet se i ka shkuar Ramës në tavolinë bashkë me emra të tjerë, të cilët sipas SHBA-BE nuk duhet të jenë në listën e kandidatëve për deputetë. Nëse për Tom Doshin, Rama kishte një alibi se nuk më pjesë e PS-së, për Sadriun nuk ka asnjë justifikim. I gjendur në një pozitë të tillë nga presioni ndërkombëtar, Rama i ka kërkuar Sadriut largimin. Por, deputeti grabiqar nuk pranon t’i ndahet Parlamentit dhe po reziston. Abazi ka nisur një fushatë të egër lobimi, duke hedhur qindra mijëra euro nga paratë që u ka përlarë shqiptarëve, për të bindur Ramën ta përfshijë në listën e Tiranës. Për t’i siguruar edhe një mandat tjetër Abazit në Kuvendin e ardhshëm po lobojnë tek Rama edhe Erion Veliaj dhe Taulant Balla, të cilët ndajnë me Sadriun interesa të fuqishme financiare.

Java që vjen do të jetë vendimtare për fatin e Sadri Abazit, nëse do ta thyjë Ramën që ta përfshijë në listë apo do largohet nga politika. Mandati i deputetit është jetik për Sadri Abazin.

Së pari, Sadriu me anë të mandati ndikon për të marrë tendera nipi i tij dhe së dyti mandatin e përdor si imunitet për t‘i shpëtuar një arrestimi të mundshëm nga SPAK. Nga ana tjetër, Rama pothujse e ka mbyllur listën e Tiranës, duke përfshirë ministret Balluku dhe Gjonaj, Majkon, ka rikthyer Fidel Yllin, ka përfshirë Toni Gogun dhe zëvendësministrin Etjen Xhafaj, ka futur Ylli Shehun dhe Reme Lalën, dhe është në tratative për të përfshirë Halit Valteri dhe Edmond Rrushin./Pamfleti