U tradhëtuan nga “Aroma” e hashashit. Arrestohen 3 shtetas, kultivonin lëndë narkotike në banesë

Policia e Tiranës finalizon një tjetër operacion policor të koduar “Aroma” pasi mësohet se ka pasur dëshmitarë që kanë nuhatur erën që cliron hashashi. Persona kanë përshtatur banesën për kultivimin e bimëve narkotike, si pasojë janë vënë në pranga 2 shtetas. Në pranga dhe një shtetas tjetër, i cili ruante ambientin e jashtëm të kësaj banese.

Shërbimet e Seksionit për Hetimin e Narkotikëve në DVP Tiranë dhe Sektori për Krimet e Rënda, në bashkëpunim me Komisariatin e Policisë Nr.6 dhe Forcën e Posaçme “Shqiponjat”, pas një pune hetimore disajavore, finalizuan operacionin antikanabis të koduar “Aroma”, në kuadër të të cilit u arrestuan në flagrancë shtetasit:
A. A., 28 vjeç dhe Xh. I., 54 vjeçe.

Këta shtetas, në bashkëpunim me njëri-tjetrin, kishin përshtatur ambientin e një banese, me aparatura që shërbejnë për tharjen dhe prodhimin e lëndëve narkotike, të cilën e paketonin dhe e bënin gati për shpërndarje me doza për përdorues të ndryshëm.

Në vijim të operacionit u bë arrestimi në flagrancë i shtetasit H. T., 50 vjeç, i cili kishte detyrë të ruante ambientin e jashtëm të banesës dhe të raportonte te dy shtetasit e tjerë në rast se shikonte lëvizjeve të dyshimta.

Gjatë kontrollit të banesës u gjetën dhe u sekuestruan në cilësinë e provës materiale 27 kg lëndë e dyshuar kanabis, një armë zjarri pistoletë, municion luftarak, aparatura që shërbejnë për tharjen dhe prodhimin e lëndës narkotike, doza me lëndë të dyshuar kokainë, një peshore elektronike dhe një automjet.

Materialet i kaluan Prokurorisë pranë Gjykatës së Shkallës së Parë Tiranë, për veprat penale “Prodhimi dhe shitja e narkotikëve” e kryer në bashkëpunim dhe “Armëmbajtja pa leje”.

Previous articlePolitikani i njohur shqiptar njofton se është izoluar prej 1 viti në shtëpi nga frika e infektimit
Next articleErion Braçe fotografon fshehurazi Lulëzim Bashën: “ 18 minuta urrejtje..shau,gënjeu..”