Operacioni “Braka”/ Kapen dy vëllezërit që shpërndanin kanabis në Tiranë, në pranga dhe ‘taksisti’ që shiste kokainë

Policia e Tiranës ka finalizuar operacionin e koduar “Braka”, për goditjen e veprimtarisë kriminale në fushën e narkotikëve. Vihen në pranga 3 shtetasit që posedonin dhe shpërndanin lëndën narkotike, 2 prej tyre vëllezër.

Specialistët e Sektorit të Hetimit të Narkotikëve dhe Trafiqeve të Paligjshme, në vijim të punës për goditjen e aktivitetit kriminal në fushën e prodhimit dhe shpërndarjes së lëndëve narkotike, bazuar dhe në informacionet e siguruara në rrugë operative, kanë goditur dy raste të shpërndarjes së lëndëve narkotike.

Si rezultat u bë arrestimi në flagrancë i shtetasve: Griseld Halilaj, 25 vjeç dhe Arnold Halilaj, 20 vjeç (vëllezër).

Këta shtetas, në bashkëpunim me njëri-tjetrin siguronin sasi të konsiderueshme të lëndës narkotike cannabis sativa dhe më pas e shisnin atë në doza të vogla, në zona të ndryshme të Tiranës.

Gjatë kontrollit fizik të ushtruar nga shërbimet e Policisë, këtyre shtetasve iu gjet e iu sekuestrua në cilësinë e provës materiale lëndë e dyshuar cannabis sativa, 1 peshore elektronike, fishekë luftarakë, 1 dorezë metalike (përforcues grushti), dy aparate celularë, 1 patentë dhe kartë ID të dyshuara të falsifikuara.

Gjithashtu, po në kuadër të operacionit “Braka” u bë arrestimi në flagrancë i shtetasit Erion Jasharllari, 39 vjeç, i cili merrej me shitje të lëndës narkotike të llojit kokainë në zona të ndryshme të Tiranës, duke e kamufluar aktivitetin e tij kriminal, me një mjet taksi që kishte në përdorim.

Gjatë kontrollit fizik nga shërbimet e Policisë, këtij shtetasi iu gjetën doza me lëndë narkotike kokainë dhe një shumë parash, të cilat u sekuestruan në cilësinë e provës materiale bashkë me mjetin.

Materialet procedurale i kaluan Prokurorisë së Shkallës së Parë të Rrethit Gjyqësor Tiranë, për veprat penale “Prodhimi dhe shitja e narkotikëve”, “Falsifikimi i letërnjoftimeve, i vizave ose i pasaportave”, “Mbajtja pa leje e armëve të ftohta” dhe “Mbajtja pa leje e municionit luftarak”.

Previous articleI akuzuar për prostitucion e pastrim parash, kapet në pikën kufitare të Janinës shqiptari i shumëkërkuar
Next articleHynte për të vjedhur në banesat e fshatit, arrestohet 22-vjeçari në Sarandë