I mori jetën pronarit të servisit për një gomë makine,arrestohet pas 7 vitesh ish-agjenti i SHISH

1 vit më parë

Ish-agjenti i SHISH Xhevahir Mzhika është arrestuar në lidhje me një vrasje të kryer në vitin 2014 tek ish Fusha e Aviacionit në kryeqytet. 7 vite më parë Mzhika vrau me armë zjarri pronarin e servisit Florian Selmani pas sherrit për një gomë makine.

Në lidhje me këtë ngjarje Mzhika është dënuar me 10 vite burg. Policia ka bërë të mundur lokalizimin e tij në bazë të informacioneve në rrugë operative dhe më pas ka ndërmarrë aksionin për finalizimin e arrestimit në rrugën “Babë Rexha”, anës lumit.

Mzhika ka tentuar të largohet por është neutralizuar nga policia.

“Finalizohet operacioni policor i koduar “Reagimi”. 

Operacioni nga Komisariati i Policisë Nr. 2, për kapjen e personave të shpallur në kërkim, me rrezikshmëri shoqërore në fushën e krimeve kundër personit.  Kapet dhe vihet në pranga 51-vjeçari i dënuar me 10 vite burg, për vrasje me dashje dhe armëmbajtje pa leje.

Në vijim të punës për lokalizimin e vendndodhjes dhe kapjen e personave në kërkim, shërbimet e Komisariatit të Policisë Nr. 2 kanë bërë lokalizimin e vendndodhjes së një personi të shpallur në kërkim për vrasje me dashje dhe armëmbajtje pa leje.  Mbi bazën e informacioneve të siguruara në rrugë operative u organizua dhe u finalizua me sukses operacioni policor i koduar “Reagimi”, si rezultat i të cilit u bë kapja dhe ndalimi i shtetasit në kërkim Xhevahir Mzhika, 51 vjeç, banues në Tiranë.

Ky shtetas u kap në rrugën “Babë Rexha”, anës lumit, dhe në momentin e ndërhyrjes së Policisë ka tentuar të largohet, por është neutralizuar nga shërbimet e Policisë.  Këtë shtetas, Gjykata e Shkallës së Parë Tiranë e ka dënuar me 10 vite burgim për veprat penale “Vrasja me dashje” dhe “Armëmbajtja pa leje”.

51-vjeçari është autori i ngjarjes së ndodhur më datë 16.08.2014, tek isha Fusha e Aviacionit, ku ka vrarë me armë zjarri shtetasin F. S”, bën me dije policia.

Të ngjashme