Në momentin që një autobus udhëtarësh, në të cilin ndodheshin 15 persona, është përfshirë në një aksident në Tregan të Elbasanit, një pasagjere ka rënë nga mjeti.

Si pasojë e plagëve të marra, pasagjerja është transportuar me urgjencë në spitalin Kirurgjik të Elbasanit, ku ka ndërruar jetë. Pasagjerët e tjerë nuk kanë asnjë dëmtim, ndërsa shoferi është shoqëruar për t’u marrë në pyetje.

Autoritetet kanë nisur hetimet për ngjarjen, ndërsa burime jo zyrtare bënë me dije se gruaja e aksidentuar ka ndërruar jetë më pas në spital pavarësisht kujdesit të mjekëve.

Policia e Elbasanit jep detaje për aksidentin e ndodhur mbrëmjen e kaluar, ku për t’i shpëtuar rrezikut një pasagjere u hodh nga autobusi, duke ndërruar jetë në spital.

Policia sqaron se ka ndërruar jetë 47-vjeçarja M. K., e cila është rrëzuar nga mjeti, pasi shoferi ka kryer manovra të rrezikshme. Për pasojë, blutë e Elbasanit kanë arrestuar shoferin e autobusit, 49-vjeçarin D. P.

“Arrestohet shtetasi D. P., 49 vjeç, banues në Elbasan, pasi në fshatin Tregan, Elbasan, duke drejtuar mjetin autobus ka kryer manovra të rrezikshme dhe për pasojë është rrëzuar nga autobusi pasagjerja shtetasja M. K., 47 vjeçe, banuese në fshatin Jagodinë, Elbasan, e cila për shkak të plagëve të marra ndërroi jetë në spital”, thuhet në njoftimin e policisë.